उमेळे परिसरातील देवस्थाने

गावाच्या पश्चिमेला हनुमान आळी. जेव्हा फार फार वर्षापूर्वी तलाव खोदला गेला त्या उत्खन्नामध्ये एक पाषाणाची हनुमान मूर्ती सापडली. गावकऱ्यांनी तलावाच्या काठावर त्याची स्थापना केली. या गोष्टीला किती काळ लोटला हे नक्की सांगता येणार नाही. परंतू त्याकाळी गावकऱ्यांनी त्यांच्या ऐपती प्रमाणे एक कौलारू मंदिर बांधले. लाकडी खांब व वर कौलारू छप्पर.गावातील जेष्ठ व्यक्ती श्री. हरिश्चंद्र केशव चैधरी वय वर्षे – 91, यांच्याशी संपर्क साधला असता त्यांनी 80 वर्षापूर्वीच्या म्हणजेच त्यांच्या लहानपणीच्या काही गोश्टी सांगितल्या त्या अशा- त्याकाळात भिंती नसलेल्या व खाच खळगे असलेल्या मंदिराची देखभाल सावंत कुटुंबातील कै. रामू काकांची आई बहिरीकाकू ही करत असे. नंतर त्या मंदिराला चारही बाजूला भिंती घातल्या गेल्या पण त्याला प्लास्टर नव्हते. आता गावातील काही दानषूर व्यक्ती व देवस्थान मंडळाच्या माध्यमातून एक सुंदर असे आखीव रेखीव मंदिर बांधले गेले आहे. त्या मंदिरात हनुमंता बरोबर गणपती, विट्ठल रखुमाई व शिवलिंगाची स्थापना करण्यात आली. या मंदिरातील हनुमानाची पाषाणातील मूर्ती ही वैशिष्टपूर्ण अशी आहे. हनुमंताने शनीला आपल्या पायाखाली दाबले आहे. ज्यांना शनीची साडेसाती असते त्यांनी या हनुमंताची पुजापाठ केल्यास त्यांना तो बाधत नाही. नंतरच्या काळात औदुंबराच्या लाकडापासुन सलग अशा कोरलेल्या हनुमंत व राम, लक्ष्मण, सीता हया मूर्ती सुध्दा या मंदिरात आहेत. हा हनुमंत नवसाला पावतो ही गावकऱ्यांची श्रध्दा. श्रावण महिन्यातील शनिवारी मारूतीरायाला नवसाची केवडयाची वाडी वाजत गाजत नाचत भरली जाते. भजन किर्तन यासारखे कार्यक्रम तसेच हनुमान जयंतीला जागृत नाटय मंडळाच्या माध्यमातून मनोरंजनासाठी दर्जेदार नाटके सादर केली जातात.