उमेळे येथील साकाई देवी वसई तालुक्यातील एक जागृत आदिशक्ती देवस्थान म्हणून प्रसिध्द आहे. श्री साकाई देवी अर्थात सकलजनाची आई असा नावलौकिक असणारे हे आदिशक्ती स्थान पाहण्यास दरवर्षी हजारो भाविक नवरात्री उत्सवाच्या निमित्ताने हजेरी लावतात. वसई तालुक्यातील आदिशक्ती स्थानांपैकी प्राचीन परंपरा जपणारी श्री साकाई देवी भक्तांच्या संरक्षणासाठी नेहमीच धावून येते, असा साऱ्यांचाच दृढ विश्वास आहे.

19 व्या शतकाच्या प्रारंभी उमेळे गावाच्या हद्दीत असणाऱ्या सोपारा (सोपार) खाडीत मच्छीमारी निमित्ताने गेलेल्या शेजारच्या गावातील मच्छीमारांना या देवीचे प्रथम दर्शन झाले. अनेक ग्रामस्थांनी प्रयत्न करूनही मूर्ती उचलण्याचा प्रयत्न अयशस्वी ठरला. याच दरम्यान त्याच दिवशी रात्री उमेळे गावच्या जेष्ठ नागरीकांस (पाटील कुटुंबातील एका मुक्या भक्तास) देवीने दृष्टांत दिला व उमेळे गावात स्थान व्हावे अशी इच्छा प्रकट केली. याप्रमाणे गावातील स्थानिक पाच भक्तांनी देवीची मूर्ती गावात आणली.

श्री साकाई देवीच्या सध्या उभे असणाऱ्या मोठया स्वरूपातील मंदिर अगोदर देवीचा प्रवास तीन पावलांत होता. या तीन पावलांत साकाई देवीने उमेळे व्यापले. प्रथम स्थान देवीचा वाडा (मुळस्थान), दुसरे स्थान श्री साकाई देवी स्थान (उमेळे – वर्तक कुटुंबीय) तिसरे स्थान सध्या उभे असलेले भव्य मंदिर स्वरूप. सन 1930 मध्ये घुमटाचे रूपांतर मंदिरात करण्यात आहे.